Ֆրանսիայում` կաթոլիկ դպրոցում, դաստիարակության խիստ մեթոդներից դժգոհ ծնողները դպրոցի տնօրենին ու ուսուցիչներին պատանդ են վերցրել: Դեպքը կատարվել է երկրի հարավում գտնվող Բեր-լ’Էթան քաղաքում: Տնօրենին ու 4 ուսուցիչների ծնողները ողջ գիշեր պատանդ են պահել, այդպիսով արտահայտելով իրենց դժգոհությունը դաստիարակության մեթոդների դեմ, որից բոլոր երեխաները սկսել էին դժգոհել:
Նրանք պահանջել են նաև աշխատանքից հեռացնել վերջերս նույն դպրոցում աշխատանքի անցած ուսուցչին: «Մենք այլ միջոց չունեինք լսելի դառնալու համար: Մեր երեխաները լացում են ամեն օր, նրանց պատժում են ու առանց հսկողության դպրոցի դռներից դուրս թողնում: Մենք այլևս չէինք հավատում ուսուցիչներին, քանի որ շարունակ խոստումներ էինք լսում, սակայն ոչինչ չէր արվում: Մեր երեխաների մեծ մասն այլևս դպրոց չի կամենում հաճախել»,- պատմել է ծնողների ներկայացուցիչը:
Ծնողները 15-ն են եղել: Ընդ որում, մեծ մասը` մայրեր: Նրանք գրավել են հաստատությունն ու ուսուցիչներին փակել դասարանում` թելադրելով իրենց պահանջները: Ոստիկանները շրջապատել են դպրոցը ու սկսել բանակցությունները: 12 ժամ անց, դպրոցի տնօրենն ու ուսուցիչներն ազատ են արձակվել, այն բանից հետո միայն, երբ տեղի կաթոլիկ եկեղեցու ներկայացուցչությունը խոստացել է , որ երիտասարդ ուսուցչին կազատի աշխատանքից: «Մենք` ծնողներս, թեթևացած ենք: Դա շատ դժվար էր և մեզ, և ուսուցիչների համար: Հիմա մենք ընդամենը ցանկանում ենք վերադառնալ տուն` երեխաների մոտ»,-ասել են նրանք:
No comments:
Post a Comment